21 Renovation Secrets

21 Renovation Secrets | Hong Kong Interior Design FAQ | Style50s

裝修 FAQ｜客人最想知嘅 21 個問題一次答晒

​

A. 錢

​

Q1. 裝修要幾錢？

冇標準價，只有標準做法。要對方分項報價（拆、水電、泥水、木工、油漆逐項列），冇分項，就冇得比較。好多時都要睇設計，冇設計都係冇得比較哦。

​

Q2. 報價單點解可以差一大截？ 通常係三樣嘢：計漏項、用料等級、工藝做法。平嗰份多數係少計咗，唔係慳咗。 比較前，先對齊：同一張圖、同一份物料表、同一個施工範圍。

Q3. 點先唔會超支？

三招：圖則定稿才開工；期間所有改動書面報價才做；預留 10–15% 備用金 ([確認])。

超支九成唔係因為貴，係因為改。

​

Q4. 付款點分期？

按進度分三期或以上，尾數一定要留（建議 5–10% ([確認])）。

​

B. 時間與工序

​

Q5. 要幾耐？

視乎面積同改動程度，一般單位約 6–12 星期 ([確認後計])。真正拖期的通常唔係師傅慢，係等材料、等決定。 所以：物料早落單，決定早拍板。

​

Q6. 正確工序係點？

設計定稿 → 清拆 → 水電 → 泥水 → 防水 → 木工／訂造傢俬 → 油漆 → 清潔 → 執修 → 驗收。 次序一亂，就要拆過。

​

Q7. 邊啲牆唔拆得？

主力牆、橫樑、外牆、防火門、公共渠位 —— 全部唔掂得。 想拆牆，先查大廈圖則，必要時入則。唔好信「師傅話得」，出事係業主上身。

​

Q8. 要唔要入則？

涉及結構、渠務改動、消防、外牆，多數要。小型工程（如更換潔具、重鋪地板）一般唔使。 最穩陣問：管理處 + 認可專業人士。

​

C. 現場與品質

​

Q9. 洗手間點做防水？

至少兩層防水 + 試水 24–48 小時 ([確認])，試完先鋪磚。 漏水九成唔係防水料差，係收口位冇做 —— 去水位、牆腳、門檻。

​

Q10. 點揀物料？

唔好淨睇樣板靚唔靚，要問三條：耐唔耐潮？ 耐唔耐曬？ 用幾年之後會點？ 香港潮濕，木板、金屬、石材嘅表現可以差好遠。

​

Q11. 點解要出施工圖、排磚圖？ 好重要 ！！！！ 

圖係用嚟對數同收口，唔係用嚟靚。出咗圖再改，圖就要更新 —— 唔係張圖冇用，係改咗冇 update。 冇圖，現場就靠估；靠估，就一定有誤差。

​

Q12. 驗收要 check 乜？

帶清單逐項行一次：門開關順唔順、櫃門齊唔齊、水電著唔著、去水通唔通、收口靚唔靚、有冇崩花同色差。 執修清單要白紙黑字 + 寫明期限，唔好口頭講。

​

Q13. 保養期幾長？

一般 12 個月 ([確認])，防水、水電類可另行訂明。問清楚保養由邊個負（公司定判頭），寫落合約。

​

Q14. 執修拖拖拉拉點算？ 唯一方法：合約訂明執修期限，並同尾數掛勾。 冇尾數在手，就冇人急。

​

D. 設計與傢俬

​

Q15. 訂造傢俬定買現成好？

位要用到盡、要收口靚、要用十年 → 訂造。趕時間、預算緊、日後會搬 → 現成。 香港樓細、樓底矮、儲物位爭崩頭，多數情況訂造贏。

​

Q16. 樓底矮可以點做？ 唔好做厚天花、唔好做層層疊嘅燈槽；收納向上發展到頂，燈光用暗藏或薄身燈。 矮樓底最忌「加一層」。

​

Q17. 設計師同裝修公司，搵邊個？

兩者都要識現場。淨識畫圖、冇落地盤經驗，圖畫到幾靚都好，現場一樣出事。

識設計、識裝修、識美感、識落地 —— 四樣都要。

​

D. 油漆： 

​

Q18. 要油幾多層？

一般：一層底漆 + 兩層面漆  。

深色、遮蓋力弱嘅色，要加多一層。 慳一層，日後色差同遮唔到底，代價更大。

​

Q19. 底漆係咪一定要？

係。底漆做三件事：封底、抗鹼、提升附著力。新灰、新水泥牆更加唔可以慳。 冇底漆 = 面漆俾牆吸咗 = 色澤唔勻、易甩。

​

Q20. 舊牆有裂痕，直接油得唔得？ 唔得。裂痕要開 V 坑 → 填補 → 貼防裂帶 → 批灰 → 磨平 → 底漆 → 面漆。 直接油上去，裂痕三個月後照樣現形。

​

Q21. 點驗收油漆？

驗油漆睇三樣：一、側光睇平整度： 自然光或現場燈掠過牆身 。二、遠睇對色——退開 2–3 米睇全幅牆，檢查色差、接痕、補口、光度唔勻。三、近睇收口——行近 30–50cm 睇天花線，收口要直要貼。